Main photo تجربتى المريرة مع زيارة برج القاهرة

تجربتى المريرة مع زيارة برج القاهرة

  • من طرف مشكلتى
  • 1061 مشاهدة

الحقيقة شفت بوست شخص كتب عن تجربة زيارته للبرج وحبيت أنا كمان أحكي تجربتي

انا للأسف اول مرة في حياتي اروح البرج كان في يوم عيد وكان يوم أسووووووود من قرن الخروب ..

وقفت اكتر من 5 ساعات ومحدش قال لي ان تيكت المطعم والتليسكوب بيتحجز من تحت ... عيد بقى ولابسة حتة بيضا طبعا عبال ما طلعت كانت تصلح حتة يتمسح بيها بلاط المطبخ مطرح ما شتحت على الارض وعلى السلالم من التعب

العدد كان مهووووول والناس محتشدة فوق ومكانوش بينظموا نزول الناس مقابل صعود غيرهم وأسانسير واحد غلبان بيشيل خمس او ست افراد فقط الي كان شغال

بعد غلب طلعنا لقيت التراس كله عبارة عن ناس واقفة وناس قاعدة على الأرض من كتر التعب والي واقف اتاريه واخد طابور النزول والطابور ملفلف حوالين عامود التراس وانا مكنتش عارفة انا كنت فاكرة ان دي ناس جاية تتفرج على مصر من فووووق

رحت للراجل بتاع التليسكوب علشان ابني يتفرج قلت له بكام التذكرة قالي بتحجزي من تحت ???? طب يا عم خد الفلوس الي انت عايزها وأكتر والولد يتفرج هنزل ازاي انا دلوقتي رفض تماماااااا

جيت انزل المطعم لان ابني طفل وجاع من كتر الوقفة وبعد غلب وصلت للباب لقيت دولابين بشريين واقفين بيمنعوني من النزول ... رايحة على فيييين ؟ رايحة على المطعم سيادتك اجيب اكل للولد ... ممنووووووووع !! نهار اسوح ممنوع ايه يا عم الولد جاع وبقى لنا ست ساعات واقفين ... لازم تحجزي تيكت من تحت ... طب خد سيادتك فلوس وهات سندوتش للولد ... لا ممنوووووووع

طب انزل طاه ... وانتي يعني أجدع من الناس الي واقفة ؟ اقفي في الطابور ... فين الطابووووور ؟ كل الي واقفين دول طابور النزول ... هاااار اسوح ده احنا قدامنا اربع ساعات تانيين ...

القصد ... اتحشرت عند الحيطة واقفة بقوة التلاحم البشري وما زالت وفود البشر تستمر في الصعود وكل الي يطلع ويحاول ينزل الدولابين البشريين يقابلوه ويوقفوه في الصف ...

شفت مساخر آي والله العظيم مساخر كل الي يطلع يتشنكل في الي قاعدين ويقع عليهم ويقوم يسب ويلعن وميتين ابو البرج على ابو الي عايز ييجي ده هما الي بيقولوا مش انا الي بقول ????

على يميني ولد وبنت لسه مخطوبين ومامتها كل شوية تتصل بيهم والواد يقول للبنت عارفة الي بتتصل لو كانت امك عليا النعمة لافسخ الخطوبة وقتي .. ويرد يا عيني بأدب ايووووة يا طنت واقفين لسه في الطابور يا طنت وصوت الولية حماته مسمع اخر الدنيا طابوووور يا صايع يا ضايع يالي واخد البت من صباحية ربونا والبت تعاااااايااااااط ...

بعد غلب غليب قالوا لنا تنزلوا عشرطاشر دور على رجلكم وتركبوا الاسانسير الي تحت ؟ قلنا ومااااالوووووو ميضرش ... نزلنا جميع انواع السلالم إشي أسمنت وإشي خشب وإشي حديد وإشي صفيح وإشي خيااااال يا نااااس وكان ناقص نتشعبط على مواسير الصرف الصحي ...

كل الي نازل وراني يزعق بصوت عالي هااااااه وصلتوا للاسانسير ؟ لا يا باشا احنا لسه على سلالم الطوب الأحمر وبعدها هتلاقوا سلالم ألمونيا وكان في واحدة حامل عمالة تنزل سلمتين وتصاااواااات هووووولد هولد لكم على السلالم كل ذلك وسط عبارات وشتائم مصرية محببة لدى النفوس في مثل تلك المواقف ...

بعد ساعة نزول على السلالم سمعنا صوت الي سابقينا هييييييه الاسانسير أهوووووو ثم عبارات شتائم خادشة للحياء ???? أتاري في طابور عااااشر واقف قدام الاسانسير دوكهومه كمان ...

القصد نزلنا الساعة 1 بالليل مشتحين ووارمين وموعوعين من الجوع لقينا الكافيتيريا الي تحت قفلت يا لاااااهوتااااااي

خرجت كتبت الكلمتين دول على الفيس وإذ يشاء السميع العليم ان يشوفه احد قيادات البرج ويعزمني بعدها على يوم جميل عوضت فيه رحلة السندباد البحري والبري الي شفتها ... وافترييييت آي والله افتريت تليسكوب وتراس وصور ونزول وطلوع وأطلع لهم لساني ... واتعزمت على العشاء على ذات نفس الترابيزة الي اتعشى عليها بوتين وكان هاين عليا آخد الكرسي او مفرش الترابيزة تذكار ... وطبعا أبو واسطة يفرق عن عامة الشعب والدهماء ????

ودمتم سالميييييين


مشكلتى
مشكلتى

مشكلتى هى منصة اليكترونية لنقل مشاكل و تجارب الافراد السلبية مع الجهات الحكومية و العلامات التجارية و المطاعم و الكافيهات .. لتحسين الخدمة و الرقى بالشكل العام لديهم ... اشترك معنا و شاركنا تجربتك